Khutbah Jum'at (27 April 2018)

BEKEL MAYUNAN BULAN ROMADON

بسم الله الرحمن الرحيم

الحمد لله الذي أرسل رسوله بالهدى و دين الحق ليظهره على الدين كله، وكفى به شهيدا. أشهد أن لا إله إلا الله وحده لا شريك له و أشهد أن محمدا عبده و رسوله لا نبي بعده. فنصلي و نسلم على سيدنا و نبينا محمد خاتم النبيين رحمة للعالمين، و على آله و  أصحابه و من تبعهم بإحسان إلى يوم الدين. أما بعد.

فيا أيها الحاضرون، أوصيكم بتقوى الله وطاعته لعلكم تفلحون، فقد قال عز و جل في كتابه الكريم: يأيها الذين آمنوا اتقوا الله حق تقاته ولا تموتن إلا و أنتم مسلمون.

Para Hadirin, jamaah Jum’at anu mulya.

Sadaya puji urang haturkeun ka Allah Robbul ‘izzati nu Maha Suci, Pangeran sadaya alam, nu maparinan ka urang sadaya kanikmatan nu teu aya papadana. Allah SWT nu masih maparinan ka urang umur pikeun nyampurnakeun ibadah ka Anjeuna. Salajengna shalawat sinareng salam mugia ditetepkeun pikeun junjunan urang, Nabi Muhammad SAW, Nabi nu kacida mulyana, hade basa tur lampahna, nu janten wasilah pikeun kasalametan urang sadaya di dunia sareng aherat. Mugia kasalametan oge dipaparinkeun ku Allah SWT pikeun kulawargana, para sahabatna, oge pikeun urang sadaya nu janten ummatna. Amin Ya Robbal’alamin.

Para Hadirin sadaya.

Dina kasempatan ieu khotib mepelingan ka diri pribadi hususna, oge ka para hadirin sadaya umumna, pikeun ningkatkeun kataqwaan ka Allah SWT. Kumargi taqwa eta hiji-hijina jalan nu bakal nyalametkeun urang, tur nu janten ukuran darajat urang di payuneun Allah SWT. Sakumaha dawuhan Allah SWT dinu Al-Qur’an:

يأيها الناس إنا خلقنكم من ذكروأنثى وجعلنكم شعوبا و قبائل لتعارفوا إن أكرمكم عند الله أتقاكم إن الله عليم خبير . (الحجرات : 13)

Hartosna: “Heuy sadaya manusa, saenyana Kami nyiptakeun maraneh ti lalaki jeung awewe, jeung Kami ngajadikeun maraneh beda-beda suku jeung bangsa. Saenyana nu pang mulyana di antara maraneh mungguh Kami nyaeta nu pang taqwa na. Saenyana Allah Maha uninga. (Q.S. Al-Hujurot: 13)

Kataqwaan oge mangrupikeun bekel nu panghadena pieun urang mayun ka Allah SWT dina dinten aherat. Allah SWT ngadawuh:

وتزودا فإن خير الزاد التقوى (البقرة: 197)

Hartosna: “Geura maraneh kabeh nyiapkeun bekel, saenyana sahade-hadena bekel teh taqwa.” (Q.S. Al-Baqarah: 19)

Para hadirin, jamaah jum’at anu mulya.

Di antawis sarana nu ku Allah SWT sayogikeun pikeun urang supaya janten jalma anu taqwa nyaeta disyareatkeunana puasa di Blan Romadhon. Bulan Romadhon anu bakal kasorang ku urang dina tilu minggu ka payun, tujuan utamana nyaeta ngajantenkeun kaum muslimin janten pribadi-pribadi anu taqwa.  Sakumaha disbutkeun dinu surat Al-Baqarah ayat 183:

يأيها الذين آمنوا كتب عليكم الصيام كما كتب على الذين من قبلكم لعلكم تتقون.

Hartosna: “Heuy jalma-jalma nu iman, diwajibkeun pikeun maraneh puasa, sakumaha parantos diwajibkeun ka jalma jalma saacan maraneh, supaya maraneh taqwa.”

Ayat ieu ngajelaskeun ka urang sadaya pentingna bulan Ramadhan. Kumargi bulan ieu sacara khusus dijantenkeun ku Allah SWT janten sarana pembinaan pikeun pribadi muslim sangkan janten jalmi anu taqwa. Salajengna, upami urang nganggap sasih Ramadhan teh penting pikeun kahirupan urang di dunia boh di aherat, maka urang kedah ngarencanakeun tur nyiapkeun ti anggangna. Langkung penting hiji momen, tangtu langkung seueur nu disiapkeun, langkung matang perencanaana. Kajaba upami urang henteu nganggap Ramadhan teh momen anu penting, maka kumaha brehna bae taya persiapan nanaon.

Dina nyiapkeun diri mayunan Ramadhan, para ulama ngajarkeun ka urang hiji do’a nu sering diaos ti Bulan Rajab keneh. Nyaeta : اللهم بارك لنا في رجب و شعبان و بلغنا رمضان

Sajaba ti do’a, aya sababaraha perkara oge nu kedah disiapkeun ku urang dina nyambut Ramadhan, supaya tujuan Ramadhan, nyaeta ngajantenkeun pribadi anu taqwa, langkung gampil dihontal ku urang. Diantawisna aya opat bekel anu kedah disiapkeun, nyaeta: Bekel Ruhani, Bekel Ilmu, Bekel Harta, sareng bekel kasehatan.

Anu ka hiji. Bekel Ruhani الزاد الروحي  nyaeta nyiapkeun rohani urang ku jalaran ngaberesihkeun jiwa tinu dosa sareng kamaksiatan. Dosa dosa nu bakal ngabeungbeuratan dina ngalakonan ibadah, nu bakal ngahambat kana semangat ngahamba ka Allah SWT. Ti mimiti ayeuna, mumpung masih aya tilu minggu deui steuacan Ramadhan, hayu urang seueurkeun istighfar, hayu urang tinggalkeun kamaksiatan, tur tingkatkeun ibadah ka Allah SWT dina raraga ngalalanyah sateuacan Ramadhan.

Dosa jeung kamaksiatan bakal nurunkeun iman, turunna iman bakal ngabeuratkeun kana ibadah. Sawangsulna ti eta, beresihna jiwa, ningkatna kataatan, bakal ningkatkeun kaimanan, nu salajengna bakal ngahampangkeun diri urang keur ibadah ka Allah SWT.

 الإيمان يزيد و ينقص، يزيد بالطاعة و ينقص بالمعصية

Hartosna: “Iman the nambahan sareng ngurangan. Nambahan ku taat, ngurangan ku maksiat.”

Mugia ku beresihna jiwa urang ditambah ku ngalalanyah ibadah, urang bakal ngaraos hampang dina ngalaksanakeun amal amal ibadah di Bulan Ramadhan. Tur diharepkeun saba’da Ramadhan, semangat ibadah urang henteu tereh luntur deui. Kumargi jiwa urang upami dikagetkeun ku ayana peningkatan ibadah nu tiba tiba, biasana bakal langsung turun deui teu lami saparantosna rengse bulan Romadhon.

Para hadirin sadaya. Aya hiji ungkapan nyaritakeun:

 كونوا ربانيين و لا تكونوا رمضانيين

Hartosna: “Geura janten jalmi jalmi nu Rabbaniy (ngahamba ka Allah), tur ulah janten jalmi jalmi nu ngahamba na saukur di Bulan Ramadhan”.

Para hadirin sadaya.

Bekel anu kadua, nyaeta bekel ilmu الزاد العلمي  . Penting pikeun urang sadaya nnyiapkeun bekel ilmu dina mayunan sasih Ramadhan. Kumargi langkung seueur ilmu hiji jalmi, maka kasempatan kenging pahala langkung ageung. Upami diibaratkeun mah sasih Ramadhan teh ibarat HP anu canggih nu seueur fungsina, tapi sakumaha canggihna eta HP lamun jalmi nu ngagunakeunana teu ngarti mah tangtu moal aya manfaatna. Contona nyatana bulan Ramadhan teh Bulan Al Qur’an, pahala maos Al Qur’an dilipatgandakeun, diitung huruf per hurufna. Dina hal ieu jalmi nu lancar maos Qur’an tangtu langkung seueur kasempatan ngakhatamkeunana dibandingkeun jalmi nu kirang lancar. Sanaos kitu, anu kirang lancar oge masih tetep kenging pahala. Ku kituna hayu urang tingkatkeun ilmu agama urang, kaji deui fiqih puasa, fiqih zakat, fiqih i’tikaf, fiqih taraweh, fadilah fadilah Ramadhan, lancarkeun maos Al Qur’an jeung sajabana.

Para hadirin jamaah jum’at anu mulya.

Bekel anu katilu nyaeta bekel harta الزاد المالي . langkung sae pikeun urang sadaya upami urang mempersiapkeun secara khusus sabagian tina rizki urang pikeun Bulan Ramadhan. Supaya konsentrasi ibadah urang henteu diganggu ku pangabutuh duniawi, utamana di akhir Ramadhan, upami tos caket ka lebaran. Padahal akhir Ramadhan eta teh waktu dimana Allah SWT maparinan ka urang sadaya kasempatan nu kacida ageungna pikeun bebas ti naraka. Bulan ramadhan teh awalna rahmat, tengahna maghfirah, akhirna pembebasan ti naraka. Kacida nyaahna upami kasempatan anu berharga ieu dugikeun ka leupas kusabab sibuk ku masalah duniawi. Kacida rugina upami urang nepikeun kaliwat henteu kenging kautamaan lailatulqodar lantaran urusan duniawi. Kumargi eta, hade pisan upami urang parantos mempersiapkeun ti ayeuna naon bae hal hal duniawi nu kinten kinten bakal ngaganggu kana konsentrasi Ibadah Urang di Bulan Ramadhan.

Para hadirin jamaah jum’at.

Bekel anu ka opat nyaeta bekel jasmani anu sehat الزاد الجسدي  . Bulan Ramadhan teh bulan nu  bakal nguras tanaga, peryogi kakiatan fisik pikeun ngalaksanakeun ibadah sacara optimal. Upami urang aya dina kaayaan teu damang atanapi kirang vit, tangtu urang moal maksimal dina ibadahna.  Asa ku nyaah, upami kasempaatan panen pahala di bulan Ramadhan henteu tiasa diraih ku urang lantaran jasmani urang nu kirang sehat. Ku kituna ngajaga kasehatan ti sateu acan lebet kana bulan Ramadhan eta oge mangrupikeun bekel nu kedah disiapkeun ku urang. Di antawisna ku cara ngajalankeun Pola Hidup Bersih dan Sehat (PHBS).

Langkung ti eta, dina salah sahiji hadis, Rasulullah SAW bgadawuh:

المؤمن القوي خير و أحب إلى الله من المؤمن الضعيف و في كل خير.

Hartosna “Jalma mu’min nu kuat langkung hade tur dipikacinta ku Allah SWT ti batan jalma mu’min anu lemah, sanajan duanana hade.”

Para hadirin sadaya.

Persiapan anu ku urang dilakukeun samemeh Ramadhan mugia janten amal sholeh nu bakal ngajantenkeun Allah ridho ka urang, kusabab ayana persiapan eta janten bukti yen urang gumbira tur seneng kadongkapan sasih anu agung, janten cirri yen urang nganggap penting kana Ramadhan. Saupamina umur urang henteu nepi ka Ramadhan, mudah mudahan parantos ditulis janten pahala ku sabab urang parantos nyiapkeun diri nu hartosna parantos niat bade ibadah di bulan ramadhan. Sing saha jalma nu nganiatkeun kahadean, tapi eta jalma henteu dugi ngalakukeun eta kahadean, maka Allah parantos nyatet pikeun eta jalmi seolah olah ngalakukeun kahadean eta sacara sempurna.

بارك الله لي و لكم بما فيه من الآيات و الذكر الحكيم و استغفروه إنه هو الغفور الرحيم.